CPLL – Conseil permanent de la langue luxembourgeoise

Aktualitéit

Dat completéiert Reegelwierk vun der Lëtzebuerger Sprooch ass do

De Conseil fir d’Lëtzebuerger Sprooch (Conseil permanent de la langue luxembourgeoise) huet den 20. Mäerz 2019 e completéiert Reegelwierk vun der Schreifweis vun der Lëtzebuerger Sprooch ugeholl.

No enger Rei vun Upassunge läit dann elo déi nei Versioun, déi vum Ministère a vum Zenter fir d’Lëtzebuerger Sprooch am November 2019 offizialiséiert gouf, vir.

Den Usproch war, e kohärent Reegelwierk ze schafen, mat deem vill méi orthografesch Fäll wéi bis elo gekläert ginn. Wéi schonn am Text Schanen-Lulling vun 2001 ginn déi Kapitele behandelt, déi am offizielle Reegelwierk gefeelt hunn: Getrennt- an Zesummeschreiwung, Grouss- a Klengschreiwung, Interpunktioun. Déi aner Kapitele sinn zum Deel gehéiereg completéiert ginn.

A ville Beräicher, virun allem der Abiergerung vu Wierder aus anere Sproochen an eng lëtzebuergesch Schreifweis, ass d’Lëtzebuerger Sprooch a permanenter Entwécklung. An deem heiten Text gëtt dorobber verzicht, komplett Lëschten unzegi vu Wierder mat hirer aktueller Schreifweis; et gëtt dofir op den offizielle Lëtzebuerger Dictionnaire (LD) verwisen, deem seng ablécklech Form de Lëtzebuerger Online Dictionnaire (LOD) ass.

Den Text ass mat ganz wéinege Fachbegrëffer geschriwwen, esou datt de Laien e versteet. An der Annex ass d’Aussprooch vun de Buschtawen am Lëtzebuergesche mat phoneeteschen Zeechen explizéiert.

Nieft dem kompletten Text huet den ZLS en Dokument mat just den Aktualiséierungen ausgeschafft, sou datt een sech séier en Iwwerbléck iwwer d’Ännerunge ka verschafen.

Weider Infoen op www.zls.lu an op www.lod.lu.

D’Dokumenter kënnen hei erofgeluede ginn.

Completéiert Reegelwierk / Iwwerbléck iwwer d’Ännerungen